Ağdərə rayonunun Çapar kəndi ərazisində yerləşən Qala orta əsr müdafiə memarlığının əhəmiyyətli nümunələrindən biridir. Ölkə əhəmiyyətli daşınmaz tarix və mədəniyyət abidələri siyahısına daxil olan bu istehkam Qarabağın dağlıq hissəsindəki qədim müdafiə tikililərindən sayılır. Çapar kəndi tarixi yolların üzərində yerləşmiş, adını isə vaxtilə dövlət poçt xidmətini həyata keçirən “çapar”lardan almışdır. Bu strateji mövqe Qalaya həm müşahidə, həm də müdafiə funksiyası qazandırmışdır. Dağ yamacında inşa edilən qala ətraf ərazilərə nəzarət üçün əlverişli mövqedə yerləşir və qalın daş divarları ilə dövrünün möhkəm tikinti ənənəsini əks etdirir. Çapar Qalası Qarabağın hərbi-müdafiə tarixini və bu torpaqların qədim strateji əhəmiyyətini özündə yaşadan mühüm tarixi abidədir.
