Xanabert qalası — Ağdərə rayonunun Vəngli kəndi ərazisində yerləşən bu tarixi istehkam Qarabağın orta əsr müdafiə memarlığının ən dəyərli nümunələrindən biridir. Ölkə əhəmiyyətli daşınmaz tarixi və mədəniyyət abidələri siyahısına daxil edilmiş qala əsrlər boyu bölgənin mühüm müdafiə məntəqəsi olmuşdur.
Vəngli kəndi uzun müddət Alban Xaçın knyazlığının mərkəzi kimi tanınmışdır. Bu strateji əhəmiyyət Xanabert qalasının inşasını zəruri etmiş, onu həm hərbi müdafiə sisteminin, həm də inzibati idarəçiliyin əsas dayaqlarından birinə çevirmişdir. Qala, Xaçın knyazlığının görkəmli hökmdarı Həsən Cəlalın iqamətgahı olan Holanaberd qalası ilə qarşı-qarşıya yerləşərək bölgənin siyasi və hərbi tarixində mühüm rol oynamışdır.Dağlıq ərazidə, geniş müşahidə imkanına malik strateji mövqedə inşa edilən Xanabert qalası qalın daş divarları, bürcləri və möhkəm quruluşu ilə seçilir. Bu istehkam yalnız müdafiə tikilisi deyil, eyni zamanda yerli əhalinin sığınacağı və təhlükəsizlik rəmzi olmuşdur.Xanabert qalası bu gün Ağdərənin tarixi irsinin mühüm abidələrindən biri kimi qorunur və Xaçın knyazlığının əzəmətini, eləcə də bu torpaqların zəngin tarixini yaşadır.
